धुळ्यात छापील कागदात खाद्यपदार्थ देणाऱ्या विक्रेत्यांवर अन्न व औषध प्रशासनाची धडक कारवाई.
प्रतिनिधी चंद्रशेखर अहिरराव धुळे.
धुळे – ग्राहकांना खाद्यपदार्थ देण्यासाठी छापील वृत्तपत्रांचा (रद्दीचा) वापर करणे आरोग्यासाठी अत्यंत घातक असल्याने अन्न व औषध प्रशासनाने धुळे शहरात धडक तपासणी मोहीम राबवली. या मोहिमेअंतर्गत साक्री रोड, वाडीभोकर रोड आणि देवपूरमधील दत्त मंदिर परिसरातील खाद्यपदार्थ विक्रेत्यांच्या आस्थापनांची कसून तपासणी करण्यात आली.
छापील वृत्तपत्रांच्या शाईमध्ये शिसे आणि कॅडमियमसारखे विषारी घटक असतात. गरम किंवा तेलकट पदार्थ या कागदात दिल्यास हे रासायनिक घटक अन्नात मिसळून आरोग्यास गंभीर धोका निर्माण होतो. अन्न सुरक्षा व मानके नियम २०१८ नुसार छापील कागदाचा वापर प्रतिबंधित आहे. असे असतानाही अनेक व्यावसायिक नियमांचे उल्लंघन करत असल्याचे या तपासणीत उघडकीस आले.
संबंधित व्यावसायिकांना छापील कागदाचा वापर तत्काळ बंद करण्याचे सक्त निर्देश देण्यात आले असून, त्यांच्यावर अन्न सुरक्षा व मानके अधिनियम २००६ अन्वये दंडात्मक कारवाई केली जाणार आहे. सर्व विक्रेत्यांनी ग्राहकांच्या आरोग्याशी न खेळता बटर पेपर, फूड-ग्रेड पाकीट किंवा सुरक्षित पॅकेजिंगचाच वापर करावा, असे आवाहन प्रशासनाने केले आहे.
