सातारा जिल्हा बँक निवडणूक अंतिम टप्प्यात!
४९ हरकतींचा निपटारा; ११ सप्टेंबरला अंतिम मतदार यादी
सातारा : प्रतिनिधी
सातारा जिल्हा मध्यवर्ती सहकारी बँकेच्या बहुचर्चित निवडणुकीची प्रक्रिया आता निर्णायक टप्प्यात पोहोचली आहे. प्रारूप मतदार यादीवर दाखल झालेल्या ४९ हरकतींचा निपटारा कोल्हापूर विभागीय सहनिबंधक डॉ. महेश कदम यांनी केला आहे. त्यामुळे आता अंतिम मतदार यादी प्रसिद्ध होण्याचा मार्ग मोकळा झाला आहे.
जिल्हा बँकेच्या निवडणुकीसाठी प्रारूप मतदार यादी प्रसिद्ध झाल्यानंतर सभासद संस्था आणि संबंधितांकडून विविध स्वरूपाच्या हरकती दाखल करण्यात आल्या होत्या. या हरकतींवर सुनावणी घेण्यात आली. त्यानंतर विभागीय सहनिबंधकांनी निर्णय देत ४९ हरकतींचा निपटारा केला.
११ सप्टेंबरला अंतिम चित्र स्पष्ट होणार
आता ११ सप्टेंबर २०२६ रोजी जिल्हा बँकेची अंतिम मतदार यादी प्रसिद्ध होणार आहे. या यादीत कोणाची नावे कायम राहतात, कोणत्या नोंदींमध्ये बदल होतो आणि अंतिम मतदारसंख्या किती निश्चित होते, याकडे संपूर्ण सहकार क्षेत्राचे लक्ष लागले आहे.
प्रारूप मतदार यादी तयार करताना विविध सहकारी संस्थांकडून एकूण २ हजार १२ ठराव प्राप्त झाले होते. त्यामध्ये विकास सेवा सोसायट्या, नागरी बँका व पतसंस्था, खरेदी-विक्री संघ, औद्योगिक व विणकर संस्था, कृषी प्रक्रिया संस्था तसेच गृहनिर्माण व दूध उत्पादक संस्थांचा समावेश होता.
निवडणुकीच्या रणधुमाळीला वेग
अंतिम मतदार यादी प्रसिद्ध झाल्यानंतर साधारण दहा दिवसांनी जिल्हा मध्यवर्ती बँकेच्या निवडणुकीचा प्रत्यक्ष कार्यक्रम जाहीर होण्याची शक्यता आहे. त्यामुळे ११ सप्टेंबरनंतर सातारा जिल्ह्यातील सहकार क्षेत्रातील राजकीय हालचालींना आणखी वेग येण्याची चिन्हे आहेत.
जिल्हा बँकेवर वर्चस्व मिळविण्यासाठी विविध राजकीय गटांकडून मोर्चेबांधणी सुरू असून इच्छुक उमेदवारांच्या नावांची चाचपणी सुरू झाली आहे. अंतिम मतदार यादी जाहीर झाल्यानंतर मतदारसंघनिहाय समीकरणे अधिक स्पष्ट होणार आहेत.
त्यामुळे ११ सप्टेंबरची अंतिम मतदार यादी ही आगामी जिल्हा बँक निवडणुकीच्या राजकीय गणितासाठी अत्यंत महत्त्वाचा टप्पा ठरणार आहे. आता अंतिम यादीत कोणाचे नाव टिकते आणि कोणाच्या हरकतींना कितपत यश मिळते, याकडे सातारा जिल्ह्याचे लक्ष लागले आहे.
एव्हीबी माझा | सातारा
