साखरवाडीत स्वर्गीय अजितदादा पवार यांची जयंती उत्साहात साजरी; प्रतिमेला पुष्पहार अर्पण करून वाहिली आदरांजली
प्रतिनिधी. शिवाजी भोसले
महाराष्ट्र राज्याचे माजी उपमुख्यमंत्री स्वर्गीय अजितदादा पवार यांच्या जयंतीनिमित्त साखरवाडी व परिसरातील युवा पिढी आणि कार्यकर्त्यांच्या वतीने महाराष्ट्र शासनाच्या अधिकृत निर्णयानुसार त्यांची जयंती अत्यंत उत्साहात साजरी करण्यात आली. राज्य शासनाने २२ जुलै हा दिवस राष्ट्रपुरुष व थोर व्यक्तींच्या अधिकृत शासकीय जयंती कार्यक्रमांच्या यादीत समाविष्ट केल्यामुळे यंदा कार्यकर्त्यांमध्ये व नागरिकांमध्ये विशेष उत्साह दिसून आला.
कार्यक्रमाच्या सुरुवातीला साखरवाडी येथील मुख्य चौकात स्वर्गीय अजितदादा पवार यांच्या प्रतिमेचे रीतसर पूजन करण्यात आले. उपस्थित सर्व मान्यवरांनी आणि युवा कार्यकर्त्यांनी दादांच्या प्रतिमेस पुष्पहार अर्पण करून अत्यंत भावपूर्ण वातावरणात त्यांना अभिवादन केले. यावेळी कार्यकर्त्यांनी अजितदादांच्या गतिमान प्रशासनाच्या आठवणींना उजाळा दिला आणि त्यांच्या कार्याचा गौरव केला.
राज्य शासनाच्या सामान्य प्रशासन विभागाने घेतलेल्या निर्णयानुसार, मंत्रालयासह राज्यातील सर्व शासकीय-निमशासकीय कार्यालये, शाळा आणि महाविद्यालयांमध्येही स्वर्गीय दादांच्या प्रतिमेला अभिवादन करण्यात आले. त्याचाच एक भाग म्हणून साखरवाडीतही युवकांनी एकत्र येत या अधिकृत पहिल्या शासकीय जयंतीचे सोपस्कार पार पाडले.
या प्रसंगी उपस्थित युवा नेत्यांनी सांगितले की, “अजितदादांचा प्रशासकीय दरारा, कामाचा धडाका आणि त्यांनी महाराष्ट्राच्या विकासात दिलेले अतुलनीय योगदान पुढील अनेक पिढ्यांसाठी प्रेरणादायी ठरेल. शासनाने त्यांच्या जयंतीचा शासकीय यादीत समावेश करून त्यांच्या लोकसेवेचा खऱ्या अर्थाने सन्मान केला आहे.”
या अभिवादन कार्यक्रमाला साखरवाडी परिसरातील सामाजिक क्षेत्रातील कार्यकर्ते, ज्येष्ठ नागरिक आणि मोठ्या संख्येने तरुण वर्ग उपस्थित होता.
