५ हजारांची लाच मागणाऱ्या म्हसवडच्या महिला पोलीस हवालदारावर गुन्हा दाखल
सातारा प्रतिनिधी
अपघाताच्या गुन्ह्यात जप्त केलेली गाडी सोडून देण्यासाठी ५ हजार रुपयांची लाच मागितल्याप्रकरणी म्हसवड पोलीस ठाण्यातील महिला पोलीस हवालदार निता नारायण पळे यांच्यावर सातारा लाचलुचपत प्रतिबंधक विभागाने (ACB) कारवाई केली आहे.
मिळालेल्या माहितीनुसार, तक्रारदाराच्या विरोधात म्हसवड पोलीस ठाण्यात भारतीय न्याय संहिता व मोटार वाहन कायद्यांतर्गत गुन्हा दाखल होता. या गुन्ह्यामध्ये त्यांची मारुती सुझुकी ओम्नी कार पोलिसांनी जप्त केली होती. ही जप्त केलेली कार पुन्हा मिळवून देण्यासाठी मदत करण्याच्या बदल्यात तपास अधिकारी असलेल्या निता पळे यांनी ५ हजार रुपयांच्या लाचेची मागणी केली होती.
याबाबत तक्रारदाराने लाचलुचपत प्रतिबंधक विभाग, सातारा यांच्याकडे तक्रार केल्यानंतर ७ जानेवारी २०२६ रोजी पडताळणी करण्यात आली. या पडताळणी दरम्यान पळे यांनी पंचांसमक्ष लाचेची मागणी केल्याचे स्पष्ट झाले. त्यानुसार त्यांच्यावर भ्रष्टाचार प्रतिबंधक अधिनियम १९८८ च्या कलम ७ नुसार म्हसवड पोलीस ठाण्यात गुन्हा दाखल करण्यात आला आहे.
ही कारवाई पुणे परिक्षेत्राचे पोलीस अधीक्षक शिरीष सरदेशपांडे, अपर पोलीस अधीक्षक अर्जुन भोसले आणि सातारा एसीबीचे पोलीस उप-अधीक्षक राजेश वाघमारे यांच्या मार्गदर्शनाखाली पोलीस निरीक्षक सुप्रिया गावडे, सुनील पाटील व त्यांच्या पथकाने यशस्वीरित्या पार पाडली. सातारच्या एसीबी विभागाने नागरिकांना आवाहन केले आहे की, कोणत्याही लोकसेवकाने कामासाठी लाचेची मागणी केल्यास त्वरित विभागाच्या कार्यालयीन क्रमांकावर किंवा हेल्पलाईन १०६४ वर संपर्क साधावा.
