कै. शिवदास मुसळे यांच्या द्वितीय पुण्यस्मरणानिमित्त बोरी शाळेत शैक्षणिक साहित्य व कपाट वाटप
खंडाळा प्रतिनिधी: गणेश गुरव
सेवानिवृत्त केंद्रप्रमुख कै. शिवदास मुसळे यांच्या द्वितीय पुण्यस्मरणानिमित्त मुसळे कुटुंबियांच्या वतीने जिल्हा परिषद प्राथमिक शाळा, बोरी येथे एक सामाजिक जाणीवेतून प्रेरित उपक्रम राबवण्यात आला. या कार्यक्रमांतर्गत शाळेतील सर्व विद्यार्थ्यांना वह्यांचे वाटप करण्यात आले, तसेच शाळेसाठी आवश्यक फर्निचर — कपाट इत्यादींचे योगदान देण्यात आले. ग्रामीण भागातील विद्यार्थ्यांच्या शैक्षणिक गरजांप्रती संवेदनशीलता दाखवत, मुसळे कुटुंबीयांनी समाजासाठी एक आदर्श निर्माण केला आहे.गेल्या वर्षीपासून सुरू असलेल्या या उपक्रमांतर्गत मुसळे परिवार शाळेसाठी आवश्यक असणाऱ्या वस्तूंचा पुरवठा सातत्याने करत आहे. फक्त शैक्षणिक साहित्यच नव्हे तर मुलांच्या एकूण विकासासाठी लागणाऱ्या सुविधांवरही त्यांनी भर दिला आहे. विद्यार्थ्यांना शिकण्यासाठी प्रेरणा मिळावी, त्यांना दर्जेदार शिक्षण मिळावे आणि त्यांच्या प्रगतीस चालना मिळावी, हाच या उपक्रमामागचा उद्देश असल्याचे कुटुंबीयांनी स्पष्ट केले.या कार्यक्रमाचे विशेष आकर्षण ठरले ते शाळेतील गुणवंत विद्यार्थ्यांच्या मार्गदर्शक शिक्षिका सौ. कल्पना राऊत यांचा सत्कार. शाळेतील विद्यार्थ्यांनी शिष्यवृत्ती परीक्षा, सैनिक स्कूल प्रवेश परीक्षा, तसेच नवोदय विद्यालय परीक्षेत यश संपादन केले असून, त्या यशामागे कल्पना राऊत यांचे मोलाचे मार्गदर्शन असल्याने त्यांचा सन्मान करून त्यांच्या कार्याची दखल घेण्यात आली. त्यांना शाल, श्रीफळ, सन्मानचिन्ह व प्रशस्तिपत्रक देऊन गौरविण्यात आले.
या कार्यक्रमासाठी प्रमुख पाहुणे म्हणून अनिता मुसळे, अॅड. गजेंद्र मुसळे, नरेंद्र मुसळे, तसेच बोरी गावाचे माजी सरपंच बापूराव धायगुडे उपस्थित होते. शाळा व्यवस्थापन समितीचे अध्यक्ष श्री. अमोल धायगुडे, सदस्य मेहबूब पठाण, मुख्याध्यापिका सौ. मनिषा सोळसकर, शिक्षकवृंद, पालक आणि विद्यार्थी यांची उपस्थिती लक्षणीय होती.या उपक्रमात विद्यार्थ्यांच्या चेहऱ्यावर उमटलेले आनंदाचे हास्य, त्यांना मिळालेली नवीन वह्या आणि कपाटाच्या स्वरूपात शाळेस मिळालेली मदत, हे सारेच दृश्य हृदयस्पर्शी होते. हा उपक्रम केवळ पुण्यस्मरण म्हणून मर्यादित राहिलेला नाही तर त्यातून समाजात सकारात्मक संदेश पोहोचत आहे. समाजातील सुजाण नागरिकांनी अशा प्रकारच्या उपक्रमातून समाजासाठी योगदान द्यावे, ही भावना या प्रसंगी अनेकांनी व्यक्त केली.कार्यक्रमाचे उत्कृष्ट सूत्रसंचालन संदीप धायगुडे यांनी केलं. त्यांच्या सहज व प्रभावी भाषाशैलीने संपूर्ण कार्यक्रमाला एक वेगळा उत्साह लाभला.अशा प्रकारचे उपक्रम ग्रामीण भागात विद्यार्थ्यांपर्यंत शैक्षणिक सुविधा पोहोचवण्यासाठी अत्यंत उपयुक्त ठरत आहेत. मुसळे कुटुंबियांचा हा उपक्रम इतरांसाठी प्रेरणादायी ठरावा, अशी अपेक्षा या वेळी सर्व मान्यवरांनी व्यक्त केली. शिक्षणाच्या वाटचालीत समाजाचे योगदान महत्त्वाचे असून, अशा विधायक कृतीतूनच समाज परिवर्तन शक्य आहे, हे या कार्यक्रमातून अधोरेखित झाले.
✦ वारसा जपणारे हात ✦
कै. शिवदास मुसळे यांची समाजसेवेची परंपरा पुढे नेणारे त्यांच्या संतानांचे कार्य .
कै. शिवदास मुसळे हे केवळ एक शिक्षक नव्हते, तर विद्यार्थ्यांच्या मनात शिक्षणाची ज्योत पेटवणारे दीपस्तंभ होते. सेवानिवृत्तीनंतरही समाजासाठी योगदान देण्याची त्यांची तळमळ कायम होती. आज त्यांच्या निधनानंतरही त्यांच्या कुटुंबियांनी त्यांच्या या सामाजिक जाणिवेच्या कार्याचा वारसा जपला आहे, हे विशेष गौरवास्पद आहे.
