जय हिंद माध्यमिक व उच्च माध्यमिक विद्यालयात मोठा आर्थिक गैरव्यवहार उघड, शाळेचे मुख्याध्यापक, सचिव, आणि क्लार्क यांच्याविरोधात चाळीसगाव पोलीस ठाण्यात गुन्हा दाखल
(चाळीसगाव प्रतिनिधी रणधीर जाधव)
शहरातील जय हिंद माध्यमिक व उच्च माध्यमिक विद्यालयात मोठा आर्थिक गैरव्यवहार उघडकीस आला आहे. या प्रकरणात शाळेचे सचिव, मुख्याध्यापक आणि क्लार्क यांनी संगनमत करून १५ शिक्षक व शिक्षकेतर कर्मचाऱ्यांच्या पगारातून ९७ लाख रुपये कपात केल्याचे समोर आले आहे. याप्रकरणी चाळीसगाव पोलीस ठाण्यात गुन्हा दाखल करण्यात आला आहे. या संदर्भात चाळीसगाव पंचायत समितीचे तालुका विस्तार अधिकारी विलास आनंदा भोई यांनी फिर्याद दिली आहे. ते जिल्हा परिषद प्राथमिक शाळेच्या कामकाजाची जबाबदारी सांभाळतात. त्यानुसार, महात्मा फुले सामाजिक व शैक्षणिक विकास मंडळ संचलित जय हिंद विद्यालयातील शिक्षक व शिक्षकेतर कर्मचाऱ्यांच्या पगार अनुदानातून अवैधरीत्या पैसे कपात केल्याचा प्रकार समोर आला आहे. शाळेचे सचिव अशोक हरी खलाणे (रा. नेताजी चौक, चाळीसगाव), मुख्याध्यापक अभिजीत जगन्नाथ खलाणे (रा. धुळे रोड, चाळीसगाव) आणि क्लार्क ज्ञानेश्वर दगा महाजन (रा. तेजस कोणार्क, धुळे रोड, चाळीसगाव) यांनी मिळून हा आर्थिक गैरव्यवहार केल्याचे उघड झाले आहे. फिर्यादीत नमूद केल्याप्रमाणे, संबंधित पदाधिकाऱ्यांनी शिक्षकांना नोकरीवरून काढून टाकण्याची धमकी देऊन बळजबरीने संमती पत्रावर सह्या घेतल्या. काही शिक्षकांची कोणतीही परवानगी न घेता आणि शासनाच्या आदेशांचे उल्लंघन करत त्यांच्या पगारातून रक्कम कपात करण्यात आली. संपूर्ण गैरव्यवहार २००६ ते डिसेंबर २०२४ या कालावधीत करण्यात आला. याप्रकरणी पोलिसांनी सचिव, मुख्याध्यापक आणि क्लार्क यांच्याविरोधात फसवणुकीसह विविध कलमांखाली गुन्हा दाखल केला आहे. पुढील तपास सुरू असून, शिक्षण संस्थांमध्ये होणाऱ्या अशा गैरव्यवहारांवर प्रशासनाने कठोर कारवाई करण्याची मागणी केली जात आहे.
