डॉ. मुंडे आत्महत्या प्रकरणी तेजस्वी सातपुते यांच्या नेतृत्वात एसआयटीचा तपास
सातारा; (उमेश लांडगे)
फलटण उपजिल्हा रुग्णालयात कार्यरत असणाऱ्या डॉ. संपदा मुंडे यांच्या आत्महत्येने संपूर्ण राज्य हादरले आहे. राजकीय दबाव आणि प्रशासकीय पिळवणूक यांमुळे त्यांचा बळी गेला असल्याचे सर्वसामान्यांना वाटते. या गाजलेल्या हायप्रोफाइल प्रकरणामुळे महाराष्ट्रातील राजकारण ढवळून निघाले आहे. विरोधकांनी सरकारला याप्रकरणी धारेवर धरले असून, या प्रकरणाशी अनेक मोठ्या नावांचा संदर्भ जोडला जात आहे. स्थानिक पोलिसांच्या चुकीमुळे संशय बळावला होता. सर्वच क्षेत्रांतून याप्रकरणी एसआयटी स्थापन करण्याची मागणी होत होती.राज्याचे मुख्यमंत्री तथा गृहमंत्री देवेंद्र फडणवीस यांच्या आदेशानुसार याप्रकरणी एसआयटी स्थापन झाली असून, या एसआयटीचे नेतृत्व दबंग आयपीएस अधिकारी म्हणून ख्याती असणाऱ्या तेजस्वी सातपुते करणार आहेत. तत्कालीन काळात साताऱ्याच्या पोलिस अधीक्षक म्हणून नेमणूक असताना त्यांनी मंत्र्यांनाही दाद दिली नव्हती, याच कारणामुळे त्यांची बदली झाल्याची चर्चा आहे. त्यांच्या काळात अधीक्षक संदीप पाटील यांनी सुरू केलेल्या उपक्रमांना प्राधान्य दिले, तसेच त्यांनी नवीन उपक्रम राबविले आणि नवा पायंडा पाडला. त्यामुळे त्यांच्या नियुक्तीमुळे एसआयटीवर सरकारचा किंवा कोणाचाही दबाव राहणार नाही, असे सद्यस्थितीत मानले जात आहे.
