श्री सद्गुरू हरिबाबांच्या २६८ व्या प्रगट दिनानिमित्त फलटणमध्ये विविध धार्मिक कार्यक्रमांचे आयोजन
रामराजे नाईक निंबाळकर यांच्या शुभहस्ते कार्यक्रमाचे उद्घाटन; भजन, कीर्तन, प्रवचन आणि महाप्रसादाची पर्वणी
फलटण | एव्हीबी माझा न्यूज
फलटण : श्री सद्गुरू हरिबाबांच्या २६८ व्या प्रगट दिन व रथोत्सव सोहळ्यानिमित्त फलटण येथे विविध धार्मिक व सांस्कृतिक कार्यक्रमांचे आयोजन करण्यात आले आहे. मंगळवार, दि. २० ऑक्टोबर २०२६ पासून सुरू होणाऱ्या या सोहळ्यात अभिषेक, हरिपाठ, भजन, प्रवचन, आरती तसेच महाप्रसाद अशा विविध धार्मिक कार्यक्रमांची रेलचेल असणार आहे. या सोहळ्यामुळे फलटण परिसरात भक्तिमय वातावरण निर्माण होणार आहे.
कार्यक्रमाची सुरुवात मंगळवारी सायंकाळी ६ वाजता रथपूजनाने होणार असून, श्रीमंत रामराजे नाईक निंबाळकर यांच्या शुभहस्ते हा कार्यक्रम पार पडणार आहे. ते श्री सद्गुरू हरिबुवा साधू महाराज देवस्थान ट्रस्टचे अध्यक्ष आहेत. त्यानंतर सायंकाळी ७ ते १० या वेळेत ‘ॐ दत्त चिले ॐ’ भजनी मंडळाकडून भजन व भारूड सेवा सादर केली जाणार आहे.
तीन दिवस विविध धार्मिक कार्यक्रम
बुधवार, दि. २१ ऑक्टोबर रोजी सकाळी ६ वाजता महाभिषेक होईल. सकाळी ८ ते ११ या वेळेत श्री हरिचरित्र वाचन व व्यासपीठावरून श्री. चंद्रकांत वादे यांची सेवा होणार आहे. दुपारी १२ वाजता आरती, तर दुपारी ३ ते ५ या वेळेत लिलावती महिला भजनी मंडळाची भजन सेवा आयोजित करण्यात आली आहे.
सायंकाळी ५ ते ६ या वेळेत ह.भ.प. दशरथ महाराज फडतरे, धुमाळवाडी यांचे प्रवचन होणार आहे. रात्री ८ ते ११ या वेळेत महाराष्ट्रातील सुप्रसिद्ध कलाकार विनोदी भारूडसम्राट ह.भ.प. श्री. चंद्रकांत वर्मा महाराज व सहकलाकार यांचे अप्रतिम भारूड सादर होणार आहे.
गुरुवार, दि. २२ ऑक्टोबर रोजी सकाळी ६ वाजता महाभिषेक, तर सकाळी १० ते दुपारी २ या वेळेत पंचक्रोशीतील सांप्रदायिक भजनी मंडळांची भजन सेवा होणार आहे. दुपारी २ ते ५ या वेळेत विविध भजनी मंडळांकडून सेवा सादर केली जाणार आहे. यामध्ये वीरशैव भजनी मंडळ, फलटण, वीरशैव लिंगायत महिला भजनी मंडळ तसेच श्री दुर्गा माता महिला भजनी मंडळ, कोळकी यांचा सहभाग असणार आहे.
सायंकाळी ५ ते ६ या वेळेत ह.भ.प. श्री. अंकुश महाराज ईबरे (पीएसआय), टाकळवाडा यांचे प्रवचन होईल. रात्री ८ ते ११ या वेळेत कोल्हापूर येथील ‘श्री साई समर्थ भजनी मंडळा’कडून भजन सेवा सादर केली जाणार आहे.
२३ ऑक्टोबरला प्रगट दिनाचा मुख्य सोहळा
शुक्रवार, दि. २३ ऑक्टोबर २०२६ रोजी श्री सद्गुरू हरिबाबा महाराज यांचा प्रगट दिन साजरा केला जाणार आहे. सकाळी ६ वाजता महाभिषेक होईल. त्यानंतर सकाळी १० वाजता श्रींच्या रथाचे प्रस्थान होणार आहे. या प्रसंगी माजी श्रीमंत संजीवराजे नाईक निंबाळकर, अध्यक्ष, जिल्हा परिषद सातारा यांच्या शुभहस्ते कार्यक्रम पार पडणार असल्याचे पत्रकात नमूद आहे.
नगर प्रदक्षिणा आणि महाप्रसाद
प्रगट दिनानिमित्त सर्व विश्वस्त व भाविकांच्या उपस्थितीत नगर प्रदक्षिणेची सुरुवात होणार आहे. श्रींच्या मंदिरापासून सुरू होणारी प्रदक्षिणा फलटण शहरातील विविध प्रमुख ठिकाणांवरून जाणार आहे. यामध्ये उड्या मारुती मंदिर, छत्रपती शिवाजी महाराज पुतळा, नगर परिषद, उपळेकर काका मंदिर, मेटकरी गल्ली, शिंपी गल्ली, श्रीराम मंदिर, गजानन चौक, मारवाड पेठ, शुक्रवार पेठ, शंकर मार्केट आणि बुरुड गल्ली आदी ठिकाणांचा समावेश आहे.
या धार्मिक सोहळ्यात सहभागी होऊन श्री सद्गुरू हरिबाबांचे दर्शन घ्यावे, तसेच सर्व कार्यक्रमांचा लाभ घ्यावा, असे आवाहन श्री सद्गुरू हरिबुवा साधू महाराज देवस्थान ट्रस्टच्या वतीने करण्यात आले आहे. सायंकाळी ७ वाजता आरती व महाप्रसादाचे आयोजनही करण्यात आले आहे.
एव्हीबी माझा न्यूज | फलटण
श्रद्धा, भक्ती आणि परंपरेचा संगम असलेल्या श्री सद्गुरू हरिबाबांच्या प्रगट दिन सोहळ्याची भाविकांना प्रतीक्षा.
