लातूर पोलीस अधीक्षक कार्यालयाच्या भरोसा सेल इमारतीचे पालकमंत्र्यांच्या हस्ते लोकार्पण
लातूर पोलिसांकडून महिला, मुलींसाठी राबविण्यात येणारे उपक्रम कौतुकास्पद – पालकमंत्री शिवेंद्रसिंहराजे भोसले
जिल्हा पोलीस दलाच्या भरोसा सेलमार्फत करण्यात आलेल्या समुपदेशनामुळे अनेक कुटुंबे विभक्त होण्यापासून वाचली आहेत. तसेच आणि अनैतिक मानवी व्यापार प्रतिबंध कक्षामार्फत जिल्ह्यातील बेपत्ता मुलींचा शोध घेवून त्यांच्या पालकांकडे सुपूर्द करण्यात येत आहे. तसेच मुलांना दामिनी पथकविषयी माहिती देण्यासाठी ‘इन्स्पेक्टर दामिनी’ पुस्तिका तयार करण्यात आली आहे. पोलीस विभागाचे महिला, मुलींसाठी राबविण्यात येणारे हे उपक्रम कौतुकास्पद असल्याचे राज्याचे सार्वजनिक बांधकाम मंत्री तथा पालकमंत्री शिवेंद्रसिंहराजे भोसले यांनी आज येथे सांगितले.
पालकमंत्री ना. भोसले यांच्या हस्ते कोनशिला अनावरण व फित कापून पोलीस अधीक्षक कार्यालयाच्या भरोसा सेल इमारतीचे लोकार्पण झाले. या इमारतीमध्ये भरोसा सेल, अनैतिक मानवी व्यापार वाहतूक प्रतिबंधक कक्ष आणि दामिनी कक्ष कार्यान्वित करण्यात आला आहे. या कक्षांची पालकमंत्री ना. भोसले यांनी पाहणी केली. तसेच येथील कामकाजाची माहिती घेतली. जिल्हाधिकारी वर्षा ठाकूर-घुगे, जिल्हा पोलीस अधिक्षक सोमय मुंडे, सार्वजनिक बांधकाम विभागाचे अधीक्षक अभियंता डॉ. सलीम शेख, कार्यकारी अभियंता देवेंद्र निळकंठ, उपअभियंता संजय सावंत, पोलीस उपअधीक्षक गजानन भातलवंडे, उपविभागीय पोलीस अधिकारी रणजित सावंत यावेळी उपस्थित होते.
पती-पत्नीमध्ये किरकोळ कारणांमुळे होणाऱ्या कौटुंबिक वादावर वेळीच तोडगा निघाला नाही तर अनेकदा घटोस्फोट, एकमेकांवर गुन्हे दाखल करण्यापर्यंत वाद वाढतो. हे टाळण्यासाठी भरोसा सेलमार्फत जोडप्यांचे समुपदेशन करण्यात येत आहे. गेल्या वर्षी जवळपास ४९१ जोडप्यांमध्ये समेट घडवून आणण्यात आला आहे. त्यामुळे ही कुटुंबे विभक्त होण्यापासून वाचली आहेत. या जोडप्यांचे आईवडील, मुले यांच्या आयुष्यात येणारी संकटे यामुळे दूर झाली आहेत. या कक्षाने यापुढेही असेच संवेदनशीलपणे काम करावे, असे पालकमंत्री ना. भोसले म्हणाले.
भरोसा सेलच्या माध्यमातून वयोवृद्ध नागरिकांनाही मदत करण्यात येत आहे. तसेच अनैतिक मानवी व्यापार वाहतूक प्रतिबंधक कक्षाने गेल्या वर्षभरात जवळपास १३२ बेपत्ता मुलींना शोधून त्यांच्या पालकांकडे सुपूर्द केल्याचे जिल्हा पोलीस अधीक्षक सोमय मुंडे यांनी प्रास्ताविकात सांगितले. भरोसा सेलच्या समुपदेशनाने समेट घडलेल्या जोडप्यांचा यावेळी प्रातिनिधिक स्वरूपात पालकमंत्री ना. भोसले यांच्या हस्ते सन्मान करण्यात आला. तसेच भरोसा सेल इमारतीचे बांधकाम गतीने पूर्ण केल्याबद्दल सार्वजनिक बांधकाम विभागाचे उपअभियंता संजय सावंत, कनिष्ठ अभियंता वर्षा सोनटक्के, सार्वजनिक बांधकाम विद्युत उपअभियंता दत्तात्रय इंगळे यांच्यासह कंत्राटदार यांचा यावेळी सत्कार करण्यात आला. भरोसा सेल, अनैतिक मानवी व्यापार वाहतूक प्रतिबंधक कक्षातील अधिकारी, कर्मचारी यांचाही पालकमंत्र्यांच्या हस्ते सत्कार करण्यात आला.
